嫲嫲，多謝你由細到大對我既照顧。仲記得好細個既時候，朝早我會跟你去耍太極，你就會買包朱古力奶或者粒粒橙汁+雞尾包俾我坐埋一邊食。
大個少少讀小學，因為媽咪返工，妹妹又返咗學，就係我同嫲嫲獨處嘅時間。雖然唔記得嗰陣時多唔多同你傾計，但每日返學你都會問我夠唔夠錢用，俾錢我小息時買零食。
到咗中學之後，由於我開始反叛，你對我嘅關心，卻換來我覺得你囉嗦。二十幾歲搬咗出去住，間唔中會返屋企，嗰段時間你開始有輕微腦退化症，雖然你會重覆問「你食咗飯未」，但係感受到你只係想關心我。
拍拖時你會叫我快d結婚，生個小朋友，2014年我終於結婚，2017年生咗BB，之後每次帶囡囡返屋企你都會好開心，仲會叫佢「妹妹」。
2017年尾，你因為心律不正入咗醫院，情況唔理想，當時我仲覺得會失去你。好彩你都可以好得返，睇到埋妹妹及堂細佬結婚。
兩日前知道你又因為心臟問題入咗醫院，我送完囡囡返屋企之後就去咗睇你。第一次睇你時你唔認得我，加上見到你好唔舒服，我真係好唔開心。食完晚飯返嚟睇你，我覺得你認得我呀，仲叫我坐⋯見到你好不容易瞓著覺，我選擇咗靜靜地離開。
琴日收到你嘅死訊，我真係好傷心，不過知道你係瞓住覺咁離開，唔需要受痛苦折磨，我先冇咁難過。
你真係好叻，可以活到95歲。希望你喺天國安息，我哋呢啲子孫已經長大喇，勿憂心！
#一路好走
#RIP
Kathryn Fong
Search